O alcalde de Ferrol, José Manuel Rey Varela, presentou aos profesionais do turismo e dos sectores relacionados con esta actividade económica: axencias, operadores, hostaleiros e comerciantes, a Ruta da Construción Naval. O primeiro edil da cidade salientou que a primeira oferta de turismo industrial coa que contará a cidade estará operativa durante a vindeira Semana Santa.
Así, este itinerario polo complexo naval e militar da ría ferrolá partirá da dársena de Curuxeiras e discorrerá polo Arsenal, con paradas no Cuartel de instrucción e o Dique da Campá, hito da enxeñería construído en 1750; así como as salas da Exponav ou do Museo Naval. A ruta tamén percorrerá as instalacións de Navantia, onde o atractivo principal será a posibilidade de coñecer os avanzados procesos que se seguen nesta factoría para a fabricación dun buque de guerra e as modernas fragatas da serie Álvaro de Bazán (F-100). O rexedor ferrolán amosouse convencido de que esta oferta “constitúe o mellor produto de turismo industrial de España, e un dos mellores de Europa, pois aglutina historia, tradición, grandiosidade e tecnoloxía de última xeración”.
