O conselleiro de Cultura e Turismo, Roberto Varela, asistiu á reunión do padroado do Centro Galego de Arte Contemporánea na que se avanzaron os eixos da programación para 2012. Neste sentido, o conselleiro adiantou que no próximo exercicio vaise realizar, entre outras actividades, unha gran exposición do artista galego Fernando Casás, un dos iniciadores do movemento Arte & Natureza, e se organizará unha mostra da artista de ‘performance’ Esther Ferrer, Premio Nacional das Artes Plásticas.
De cara o próximo ano, Roberto Varela asegurou que o CGAC vai continuar realizando colaboracións con outros centros nacionais e internacionais para “contribuír a que este museo siga a ser unha referencia”. Do mesmo xeito, apuntou que 2013 vai ser un ano “moi importante para o CGAC xa que celebrarase o vixésimo aniversario da apertura do museo e se conmemorará cunha programación moi especial”.
Sobre o orzamento do Centro Galego de Arte Contemporánea para o próximo ano, o conselleiro anunciou que se incorporará unha partida de 200.000 euros “para a compra de obras de arte a galerías maioritariamente galegas, un feito que conseguirá achegar aínda máis o CGAC ás galerías e aos artistas galegos”.
