A moda dos tecidos intelixentes chega á Cidade da Cultura da man do seu máximo expoñente: a artista norteamericana Alyce Santoro, que o vindeiro mércores, 14 de decembro, impartirá un obradoiro de paisaxes sonoras. Ademais, presentará o ‘traxe sonoro galego’, que se compón de prendas de roupa confeccionadas en colaboración con músicos e deseñadores de Galicia.
Coñecidos no mundo do deporte polas posibilidades que ofrecen para obter datos do corpo humano, os tecidos intelixentes atopan da man de Santoro unha función artística a través do denominado ‘Sonic Fabric’, un tecido feito cun 50% de cinta de casete reciclada e outro 50% de algodón que, ademais de ser fermoso e duradeiro, tamén é audible: pódese escoitar pasando o cabezal dun radiocasete ou walkman pola súa superficie.
Para a súa presentación en Galicia, a artista neoiorquina decidiu confeccionar unha tea cos arquivos sonoros dixitais remitidos por máis de sesenta bandas e músicos galegos, que van dende Berrogüetto a Nadadora ou Niño y Pistola. Listos os 25 metros de tea, tres mozos deseñadores encargáronse de darlle forma: Adrián Rivas, Antonio Santos e David del Río, os tres gañadores do desfile Debut 2011, organizado pola escola de Estudos Superiores en Deseño Téxtil e Moda de Galicia (Esdemga) da Universidade de Vigo.
A presentación do denominado ‘traxe sonoro’ terá lugar o vindeiro mércores 14 de decembro ás 20,30 horas na Biblioteca de Galicia (entrada libre e de balde) no marco dunha intervención multidisciplinar na que ademais de música, moda e deseño se darán cita paisaxistas sonoros como Juan Gil, de www.escoitar.org; artistas de vídeo como Horacio González; ou de danza como Ángela Blanco. Previamente, Alyce Santoro dirixirá na Cidade da Cultura un obradoiro no que confeccionar ‘paisaxes sonoras’ a partir de gravacións realizadas no propio complexo do Gaiás.
