A Deputación da Coruña presentou o programa de concertos que ofrecerá nas próximas semanas a Orquestra Sinfónica de Melide. As actuacións de carácter gratuíto serán o día 16 de marzo na Igrexa de San Francisco de Betanzos; o día 25 no Teatro Jofre de Ferrol; o 31 no Centro Cultural Ágora da Coruña; e, por último, o 1 de abril no Auditorio de Galicia en Santiago.
Soarán temas en homenaxe a Frank Sinatra, Whitney Houston, Gary Moore, Michael Jackson ou Amy Winehouse. Nos concertos, que serán gratuítos (no Centro Ágora e no Jofre haberá que recoller alí previamente a invitación), participarán as voces de Susana de Lorenzo, Alberto Cunha e a moza melidense Irene Ruíz.
