A Coruña pecha un verán con bos índices de actividade turística xa que a ocupación hostaleira na cidade durante o mes de agosto situouse en case un 87%, case un 4% máis que durante o mesmo mes do ano anterior, mentres que en xullo subiu un 3%.
Ademais a tarifa media incrementouse un 7,61% en xullo e un 10,39% en agosto o que supón un incremento no impacto económico do turismo na cidade.
En canto á procedencia dos visitantes, o 20,5% foron internacionais, destacando os franceses, italianos e británicos. Dos residentes en España a maioría foron madrileños, andaluces e cataláns.
Por outra banda, a Torre de Hércules recibiu a visita de 46.200 persoas, trátase dun 5% máis que durante o verán pasado.