O establecemento de Fisterra, etel&pan, inaugurado o pasado mes de xuño baixo o concepto de bocadillos e galería ultramarina, ocupa os primeiros postos en webs internacionais de viaxes como Tripadvisor.
Esta pequena tenda coida os detalles dun bocadillo con pan do día, carnes de primeira calidade, conservas artesanais e con produtos frescos locais. O cliente elixe a mesa para gozar do manxar e das vistas, xa que un dos obxectivos do establecemento é poñer en valor o patrimonio paisaxístico da zona.
Situada nunha antiga casa mariñeira da rúa Real de Fisterra, conta cunha galería de pezas singulares vinculadas ao mar e realizadas por artesáns galegos.
