O Fórum Gastronómico da Coruña celebrará a quinta edición do Concurso de Pulpeiras/os que buscará, un ano máis, as mellores pulpeiras e pulpeiros de Galicia.
O concurso está aberto a profesionais galegos especializados na cocción e o servizo de polbo e a aqueles que desenvolvan a súa actividade en Galicia.
O concurso terá lugar o 15 de marzo no auditorio do recinto de ExpoCoruña durante a primeira xornada de Fórum Gastronómico Coruña 2015.
A organización fixou un máximo de oito participantes e a súa aceptación será por estrita orde de inscrición, que ha de formalizarse antes do día 26 de febreiro. Os participantes do concurso deberán preparar o polbo simultáneamente, nun acto aberto ao público.
O xurado estará integrado por prestixiosos cociñeiros, gastrónomos e persoas do mundo da cultura de Galicia en xeral e de Coruña en particular e será o encargado de puntuar criterios como o sabor do polbo, a textura e o punto de cocción, o aliño e o corte e a presentación.
A pulpeira, ou o pulpeiro, coa mellor puntuación obterá o primeiro premio, dotado con 1.000 euros. O segundo e terceiro premio están dotados con 400 e 200, respectivamente.
Imaxes de Xurxo Lobato. Edición 2014