Segundo os datos da Enquisa de Movementos Turísticos en Fronteiras (FRONTUR) máis de 186.000 turistas estranxeiros elixiron Galicia no primeiro trimestre do ano, cifra que supón un máximo histórico na comunidade. Desta forma, Galicia superou neste primeiro trimestre do ano nun 10% a cifra do mesmo período do pasado ano 2014.
Segundo FRONTUR, Portugal, co 59,5% dos turistas estranxeiros, foi o principal mercado internacional en Galicia neste primeiro trimestre do ano. Seguen en orde de importancia Reino Unido, co 10,2%, e Francia, co 8,3% neste caso. En termos dinámicos resulta moi relevante o crecemento rexistrado polo mercado portugués que neste primeiro trimestre presentou un incremento superior ao 20% na súa cifra de turistas.
