Os máximos responsables do International National Trusts Organisation (INTO) percorrerán o próximo mes de setembro o Camiño Inglés a Santiago de Compostela nunha actividade promovida pola entidade Tesouros de Galicia en colaboración coa Deputación da Coruña para promover esta ruta.
Entre o 15 e o 19 de setembro poderán valorar e gozar do patrimonio que esconde o Camiño Inglés, descubrindo a pé arte, historia e cultura. Tamén está previsto que os británicos participen en diversos actos promovidos por concellos, asociacións e colectivos dos diferentes municipios que pertencen á ruta, sen esquecer aspectos como o gastronómico ou o turístico.
A entidade promotora da iniciativa mantén aberta a posibilidade de que calquera colectivo ou organización se sume ao proxecto participando na totalidade ou parte do itinerario. Tamén invita ao público a sumarse á camiñada que pasará polos dezaoito municipios que vertebran o Camiño Inglés.
Tesouros de Galicia encóntrase inmersa nun proxecto de revalorización do Camiño Inglés, que conta coa achega de 28.320 euros por parte da Deputación Provincial da Coruña, o que supón un 80% do total do presuposto total do proxecto. A visita do comité de INTO é unha das medidas de promoción que se levarán a cabo ao longo do proxecto xunto a outras actividades previstas nos municipios do ámbito do Camiño Inglés.
MÁIS INFORMACIÓN EN Tesourosdegalicia.com
