A 13ª edición do Campionato Galego de Coctelería Clásica acreditou ao profesor Pedro Sestayo como o mellor coctelero galego do ano. O seu cóctel Pindo’s Sea and Mountain foi considerado polo xurado o mellor do concurso, mentres que o de Juan Manuel Díaz, do restaurante vigués Mariña Dávila e campión da edición anterior conseguiu o segundo posto. Pola súa banda, Santiago Lamego, da coctelería compostelá Vaová coa súa creación Lamegorujo alzouse co Trofeo Especial ao Mellor Cóctel con Augardente de Galicia, patrocinado polo Consello Regulador das Augardentes e Licores Tradicionais de Galicia.
Lamego e Sestayo serán os nosos representantes no Campionato Nacional da Asociación de Barmans Españoles Málaga 2014.
Finalmente Carlos Abilleira foi o campión na modalidade acrobática de flairtending, que este ano se consolidaba coa súa quinta edición e seis participantes. Xunto con Miguel Durán, acudirán ao campionato nacional desta modalidade.
