A cidade da Coruña volverá ser sede, por segundo ano consecutivo, do Fórum Gastronómico, un evento que o ano pasado logrou congregar máis de 21.000 asistentes.
Baixo o lema Repetirás!, o Fórum Gastronómico celebrarase os días 15, 16 e 17 de marzo de 2015 en EXPOCoruña baixo o mesmo formato que edicións anteriores: combinando unha feira de produto de calidade con actividades que reunirán grandes cociñeiros galegos, nacionais e internacionais.
Aínda que por agora non se desvelou o programa, a organización avanzou que se repetirá formato e obxectivos pero que se incluirán elementos innovadores, entre os que destaca a creación de espazos diferenciados e tematizados para os dous tipos de público existente: o profesional e o gastrónomo.
As datas elixíronse no mes de marzo co obxectivo de non coincidir con outros eventos de carácter gastronómico que se celebran durante febreiro -data habitual do certame- na xeografía galega.
