A Concellería de Turismo do Concello de Ferrol recuperará en Semana Santa a Ruta da Construción Naval. O obxectivo desta iniciativa é dar a coñecer o complexo naval e militar da ría, polo que a ruta de turismo industrial será reactivada do 2 ao 5 de abril.
Para as visitas guiadas ao Arsenal Militar poderanse adquirir os tickets na oficina de Turismo da dársena de Curuxeiras, onde comezará o percorrido militar ben ás 11.00 horas ou ás 12.30 horas. No caso de Navantia, o city-tren sairá da Praza de Galicia tamén ás 11.00 horas e ás 12.30 horas e os tickets poderán ser adquiridos no mesmo city-tren. En ámbalas dúas visitas será necesario realizar unha inscrición previa na oficina de Turismo de Curuxeiras, ou ben chamando ao teléfono: 696 531 070.
Ademais, do 2 ao 4 de abril, tamén terán lugar as visitas teatralizadas ao Castelo de San Felipe. Os interesados poderán visitar a fortaleza ferrolá realizando un paseo en lancha pola ría, con saída ás 16.45 horas dende o peirao de Curuxeiras; ou ben acercándose ao propio Castelo de San Felipe e uníndose á visita teatralizada ás 17.45 horas.
