Turismo de Galicia en colaboración coa Fundación Catedral de Santiago e o Arcebispado puxo en marcha as primeiras xornadas de portas abertas do Pazo de Xelmírez.
A iniciativa cultural, que é gratuíta ata o 7 de febreiro, inclúe visitas guiadas que permitirán coñecer o resultado das obras de rehabilitación levadas a cabo no marco da celebración do VIII Centenario da Peregrinación de San Francisco de Asís a Santiago. As visitas realizaranse ás 10:00 e ás 18:00 horas.
As obras realizadas xunto coa celebración das xornadas supoñerán a dinamización da oferta cultural de Santiago, abrindo este pazo medieval situado na praza do Obradoiro a todos os que queiran coñecer a construción de estilo románico que debe o seu nome a Diego Gelmírez, primeiro arcebispo de Santiago.
