O certame gastronómico PontedeTapas volverá entre os días 28 deste mes de novembro e o 8 de decembro para cubrir a programación turística municipal durante a ponte das festividades da Constitución e da Inmaculada.
A cita, que chega este ano á súa sétima edición, manterá os prezos en 1,50 euros para as tapas e 2,50 euros para os cócteles. Os hostaleiros competirán nas modalidades de tapa tradicional (elaboradas con produtos da terra) e creativa (centrada nas novas tendencias, pero sempre a partir de produtos autóctonos).
Debido ao seu éxito, mantense a novidade da gala final, que se celebrará o 15 de decembro. Pontevedra foi a primeira cidade en introducir esta cerimonia, na que as tapas finalistas se elaboran en directo para a votación final do xurado profesional.
