A Deputación da Coruña puxo en marcha esta fin de semana o servizo de atención aos visitantes nas instalacións das Torres do Allo en Zas; dos Batáns de Mosquetín en Vimianzo e do Pazo de Mariñán en Bergondo.
As visitas guiadas e gratuítas manteranse ata o 14 de setembro nos tres monumentos. Nos Batáns de Mosquetín o horario será de 11:00 a 19.:00 horas todos os días, incluíndo domingos e festivos. Nas Torres do Allo a atención chega ata as 20:00 horas e no Pazo de Mariñán as visitas guiadas ao interior realizaranse entre as 11:00 e as 18:00 horas, mentres que no exterior son libres entre as 09:00 e as 21:00. O teléfono de atención a visitantes para os tres bens patrimoniais é o 673 774 100.
Por outra banda, o Dolmen de Dombate xa se pode visitar e, como novidade, este ano organízanse visitas nocturnas os venres. Neste caso o horario de atención ao público é de martes a domingo de 11:00 a 14:00 e de 16:00 a 20:00 horas en temporada alta (de xullo a setembro) e durante os meses de inverno a recepción de visitantes concentrarase nas fins de semana.
