O Boletín Oficial da Provincia da Coruña publicou as bases da contratación dos servizos de transporte de visitantes ao Mosteiro de Caaveiro para este ano, no que se mantén o punto de saída dende o Concello da Capela, unha novidade que se incorporou o pasado ano e que se suma ao xa tradicional situado no Centro de Interpretación das Fragas.
Así, os visitantes poderán elixir entre deixar o seu coche na entrada das Fragas do Eume para subir ata o monumento ou acudir ás Neves e estacionar no aparcamento da Ventureira.
O servizo para Semana Santa comezará o 27 de marzo e prolongarase ata o 6 de abril, ambos os dous inclusive, mentres que a temporada estival se adiantará ao 20 de xuño e rematará o 6 de setembro. Este programa permite acceder en autobús ao mosteiro en temporada alta, aínda que o monumento permanece aberto a todo o que o desexe durante todo o ano.
O orzamento do contrato ascende a 52.569,62 euros e as empresas interesadas en optar a el teñen un prazo de quince días naturais contados dende hoxe para presentar as súas ofertas.
