Imaxe: Presentación de Think in Cakes aos medios na FNAC A Coruña
Os organizadores da feira de repostaría artística Think in Cakes, que se celebra o fin de semana do 27 e 28 de setembro en ExpoCoruña, confían en superar os visitantes da pasada edición.
Como principais novidades, resaltaron a incorporación á feira da repostaría tradicional, para ampliar o público ao que está destinada, para o cal contan coa presenza de dous profesionais de prestixio, o portorriqueño afincado en Miami Antonio Bachour e o confeiteiro asturiano Alberto Díaz.
Os amantes da repostaría artística poderán aprender doutros grandes mestres, entre os que destaca o estadounidense Mike McCarey, que impartirá catro clases maxistrais en Think in Cakes na que será a súa primeira visita a Europa.
Ademais, a Torre de Hércules terá o seu protagonismo na feira. Un equipo de dez persoas encargarase da elaboración e da montaxe dun biscoito coa súa forma, que poderá ser presenciado por todos os asistentes á feira. Para a elaboración desta Torre de Hércules de máis dun metro de altura utilizaranse máis de 30 quilos de chocolate, 30 quilos de ganaché, 15 quilos de amorodos e 450 ovos, o que dará como resultado máis de 60 quilos de biscoito.
